|
Máis recente foi o proxecto de reconstrucción dos instrumentos esculpidos na pedra que hai no Pórtico do Paraíso da Catedral de Ourense. Este foi un proxecto preconcebido polo Director do Obradoiro, Manuel Brañas, que baixo a tutela da Deputación, e aproveitando o emprezamento do Obradoiro nunha cidade como Ourense, que posúe unha Catedral cuio Pórtico é quizais,
despois do de Santiago, o máis importante de Galicia, pensou que a reconstrucción destes instrumentos sería de gran importancia cultural e histórica xa que aportaría novos datos para o coñecemento da música medieval.
Unha tarefa difícil polas razóns que sinalaremos máis adiante, e tamén polo feito de que o Obradoiro ten como principal finalidade a construcción de instrumentos tradicionais (creado para tal fin polo Organismo Provincial), e toda actividade suplementaria sería paralela coa anterior.
Un feito que ía facilitar esta labor foi a participación do Obradoiro de Ourense na reconstrucción dos instrumentos esculpidos no Pórtico da Gloria da Catedral de Santiago, aínda que para aquel entón o Obradoiro xa reconstruíra o Organistrum do Pórtico da Catedral de Ourense, que é quizais o instrumento máis importante e complicado dos alí esculpidos.
Depois dun traballo minucioso de investigación e de habilidade artesanal rematouse no Obradoiro a reconstrucción de tódolos instrumentos esculpidos no Pórtico do Paraíso, intentando sempre que éstes gardasen a máxima fidelidade tanto co modelo escultórico como coa súa sonoridade e sobre todo que tiveran unhas proporcións adecuadas para adaptalos ó instrumentista.
|
